Loading... आजः २०७८, ४ असार शुक्रबार

गजल – पूर्ण भण्डारी “पवित्रदीप”

सच्चा पुरूष् अनि नारीका कुरा छन्
मैले नकाटेको दाह्रीका कुरा छन् ।


सम्झिन्छिन् होला कि बिर्सिसकिन् कुन्नि ?
हामीसँगै खेल्ने चारीका कुरा छन् ।


वर्षातको याम, वीचमा छल्दी खोला
उनी हुँदा पारी, वारीका कुरा छन् ।


मैले मेलो खन्नी, उनले कोदो रोप्नी
हामी भेट्ने मकै बारीका कुरा छन् ।


कोहीकोहीलाई दही मन् पर्छ भनी चोरी 
आधी बनाएको आरीका कुरा छन् ।


कुलो लाउनी निहुँमा भेट्न पाइन्थ्यो भन्यो 
आफ्नो भने खेत टारीका कुरा छन् ।


बोल्न लाज लाग्ने, भेट्ने ठाउँ कस्ता
खन्निउँ, काफल्, ऐंसेलु घारीका कुरा छन् ।


काम् गर्दा घाम् पानी भन्न कहाँ पाइन्थ्यो र !
डोको, नाम्लो अनि भारीका कुरा छन् ।


कमिज् अनि मेड्डीमा देखिरहेको 
अहिले ब्लाउज् अनि सारीका कुरा छन् ।


(गुल्मी)