दैलेखको नाभिस्थानमा भोलीदेखि पञ्चकोशी धार्मिक पर्यटन मेला सुरु हुने

दैलेख, वैशाख १२ गते। दैलेखको दुल्लु नगरपालिका–१० स्थित पञ्चकोशी धामअन्तर्गत नाभिस्थान मन्दिर परिसरमा भोलि (वैशाख १३ गते)देखि पञ्चकोशी धार्मिक पर्यटन मेला सञ्चालन हुने भएको छ।
पञ्चकोशी क्षेत्र विकास संस्था दैलेखको आयोजनामा वैशाख १३ गतेदेखि १९ गतेसम्म सञ्चालन हुने मेलाको सम्पूर्ण तयारी पूरा भएको मूल आयोजक समितिका अध्यक्ष तथा संस्थाका अध्यक्ष नवीन योगीले जानकारी दिए। “धर्म, संस्कृति र पर्यटनको संगम, पञ्चकोशी मेला हाम्रो पहिचान” भन्ने नाराका साथ मेला आयोजना गर्न लागिएको हो।
नेपाल तथा भारतलगायतका हिन्दु धर्मावलम्बीहरूको आस्थाको केन्द्रका रूपमा रहेको पञ्चकोशी क्षेत्रको धार्मिक, ऐतिहासिक, पुरातात्विक तथा सांस्कृतिक महत्त्वलाई राष्ट्रिय तथा अन्तर्राष्ट्रिय स्तरमा प्रवर्द्धन गर्ने उद्देश्यले मेला आयोजना गरिएको आयोजकले जनाएको छ। साथै धार्मिक पर्यटनमार्फत पूर्वाधार विकासमा टेवा पुर्‍याउने अपेक्षा गरिएको छ।
दैलेखस्थित पञ्चकोशी क्षेत्र प्राचीनकालदेखि नै धार्मिक तथा आध्यात्मिक चेतनाको जीवित धरोहरका रूपमा परिचित छ। विभिन्न पुराणमध्ये विशेषगरी स्कन्द पुराणमा यस क्षेत्रलाई वैष्णव (ज्वाला/अग्नि) क्षेत्रका रूपमा वर्णन गरिएको पाइन्छ। यहाँ रहेका दिव्य ज्वाला क्षेत्र, पौराणिक तीर्थस्थल, मौलिक संस्कृति र प्राकृतिक शान्त वातावरणले श्रद्धालु तथा पर्यटकलाई विशेष आकर्षण प्रदान गर्ने विश्वास गरिएको छ।
धार्मिक मान्यताअनुसार, भगवान शिवले सतीदेवीको मृत शरीर बोकेर परिक्रमा गर्ने क्रममा विभिन्न अंगहरू खसेका स्थानमध्ये नाभिस्थानमा नाभि पतन भएको विश्वास गरिन्छ। सोही कारण यहाँ आजसम्म अखण्ड ज्वाला प्रज्वलित रहेको जनविश्वास छ। यस पवित्र भूमिमा स्नान, पूजा–अर्चना, पिण्डदान तथा अन्त्येष्टि गर्दा मनोकामना पूरा हुने र स्वर्गप्राप्ति हुने धार्मिक विश्वास रहेको छ।
मेलाअवधिभर स्कन्द पुराण वाचन, धार्मिक प्रवचन, आध्यात्मिक सत्संग, भजन–कीर्तन तथा पूजा कार्यक्रम सञ्चालन गरिनेछ। साथै पञ्चकोशी क्षेत्रको धार्मिक यात्रा तथा दर्शन कार्यक्रम, पर्यटन प्रवर्द्धन गतिविधि, प्रत्येक बिहान बटुकहरूद्वारा स्वस्तिवाचन र हरेक साँझ आरती कार्यक्रम आयोजना गरिनेछ।
त्यसैगरी, मेलामा १८ वर्षीया कथावाचिका पुज्य माता कृर्ति किशोरीजीको मुखारविन्दबाट कथा–पुराण वाचन गरिने कार्यक्रम रहेको अध्यक्ष योगीले बताए।